Змаганє за найлєпши школи швета

Медзинародна образовна институция T4 Education послала поволанку нашей школи за участвованє на змаганю T4 World’s Best School Prizes, виборе за найлєпши школи швета! Критериюми оценьованя нє засновани на технїчней порихтаносци, локациї або инфраструктури школи, алє на пошвеценосци роботи, напредованю и иновацийох хтори ше витворюю у наставним процесу. Беруци до огляду позитивни тренд унапредзованя квалитету роботи у нашей школи и сотрудзованє школи з розличнима образовнима орґанизациями нє лєм у Сербиї алє и у швеце, така поволанка була обчекована. То перше участвованє даякей школи з нашей општини на змаганю такей файти та ше будземе намагац же бизме нашу школу и нашу општину представели у цо лєпшим шветлу!