Традицийни наградни конкурс Пошти Сербиї

На традицийним наградним конкурсу Пошти Сербиї, под назву „Писмо Божич Бати“,

на котрим могли участвовац дзеци зоз цалей Сербиї по 12 роки, и най ше, креативно,

литерарно и подобово виража на тему „Крачунске рано“, участвовали и школяре нашей школи.

Роботи оценьовала Комисия котру творели писателє Милош Янкович, Ясмина Малешевич и Ґроздана Лалич, и визначни дизайнере, подобово и ґрафични уметнїки Пошти Сербиї.

Пошта Сербиї преглашела побиднїкох 14. януара 2023. року. Святочне додзельованє наградох побиднїком орґанизоване у Савским парку, у амбиєнту шветочного фестивала “Шнїгова сказка“, у Беоґрадзе на води.

Награди побиднїком додзельовали о.д. директора Пошти Сербиї Зоран Дьордєвич, викарни епископ топлички Петар и предсидатель Здруженя писательох Сербиї, Милош Янкович.

Медзи наградзенима школярами, у ґрупней конкуренциї подобових роботох, 2. место завжали школяре II/3 класи зоз учительку Марию Полдруги, ОШ “Братство єдинство“ зоз Коцура.

Школяре на креативни способ виражели свойо видзенє крачунского рана, хаснуюци технїку пастела зоз динамичнима композициями крачунских мотивох зоз декоративнима прикрасками.

Наградзени школяре на дарунок достали ваучер у вредносци од 80.000 динари. Подаровани им и новорочни пакецики за цале оддзелєнє.

Наградзени дзецински роботи виложени на вистави у ПТТ музею у Беоґрадзе.

Винчуєме наградзеним школяром и їх учительки на успиху и награди.