За школяра ґенерациї у коцурскей Основней школи „Братство єдинство” за школски 2021/2022. рок вибрана школярка осмей класи руского оддзелєня Мартина Уйфалуши.
Окрем одличного успиху котри зазначовала през осем роки основношколского образованя, Мартина ма и вельочислени таланти котри ше єй з вредну роботу, закладаньом, одвичательносцу и трудом поспишело указац. Визначела ше зоз справедлївосцу и порихтаносцу помогнуц каждому кому помоц потребна. Представяла свою школу на найлєпши способ.
Мартина под час свойого школованя зазначела окремни резултати на окружних и републичних змаганьох з руского язика и язичней култури. Тиж, ношитель є припознаня „Славка Сабадош” од першей по осму класу.
Од пиятей класи, накадзи ступела до висших класох, Мартина участвовала на вецей змаганьох зоз рижних обласцох. Школярка є и Основней музичней школи у Вербаше, инструмент клавир. За свойо интересованя, схопносци и указане знанє на числених змаганьох достала вецей припознаня, та своєй школи тота вредна школярка була лєм поцешенє.
Мартина ношитель и Вуковей дипломи. Наздаваме ше же у будучносци предлужи зоз шорованьом успихох и же витвори шицки свойо жаданя и цилї.
