Дзень школи

Пондзелок, 9. мая, преславели зме Дзень школи з рижнима активносцами у хторих уживали и школяре и наставнїци и мили госци.

Пред поладньом отримани спортски активносци.

У конґох школи була поставена вистава роботох наших вредних школярох.

У лєтнєй учальнї отримана креативна роботня на тему “Модни креатор — сукня за матуру”.

Зоз помоцу сучасней ИКТ опреми отримани “Язични квиз”.

Школяром були интересантни и “Оптични илузиї”.

Шицки зме уживали на “Фестивалу науки”.

Єдна часц преслави була пошвецена хижним любимцом.

Школяре хтори зацикавени за технїку мали нагоду участвовац у мераню предметох хтори ше нє можу вимерац анї зоз драбинку. Принцип роботи потолковани на табли у учальнї дзе инструмент и випробовани. Потим зме з ґрупу школярох пошли опрез римокатолїцкей церкви, намесцели инструмент и вимерали висину од жеми по сам верх крижа. Тиж так зме вимерали и висину нашей школи цо зме зазначели и з фотоґрафиями.

Найвецей були нащивени “Караоки” у хторих участвовали и школяре и наставнїци.

Пополадню отримана приредба, на хторей директорка школи додзелєла пригодни дарунки найуспишнєйшим школяром нашей школи и їх ментором. На приредби  була присутна и Радица Карович, предсидателька Здруженя “Млади математичар”, хтора додзелєла медалї нашим школярком за освоєне 3. место на Републичним и Медзинародним змаганю “Мост математики” зоз проєктом на тему “Мрежа”.